អគារអតីតសណ្ឋាគារអង្គរមានជ័យ នៅលើមហាវិថីកម្ពុជាក្រោម
អគារចំណាស់ជាអតីតសណ្ឋាគារហៅថា សណ្ឋាគារអង្គរមានជ័យ ដែលស្ថិតចំកណ្តាលរាជធានីភ្នំពេញ មានអាយុកាលប្រមាណជា៧៥ឆ្នាំ ត្រូវបានចាប់ផ្តើមវាយកម្ទេចបន្ទាប់ពីអាជ្ញាធរបានចរចាឲ្យប្រជាពលរដ្ឋនៅទីនោះចាកចេញ។
នៅថ្ងៃទី ១៣ តុលា ២០២៥ អាជ្ញាធរបានចាប់ផ្តើមវាយរំលំសំណង់អគារអង្គរមានជ័យស្ថិតនៅលើផ្លូវកែងរវាងមហាវិថីព្រះមុនីវង្ស និងមហាវិថីកម្ពុជាក្រោម ក្នុងភូមិ ១ សង្កាត់មនោរម្យ ខណ្ឌ ៧ មករា រាជធានីភ្នំពេញ។ អគារអតីតសណ្ឋាគារអង្គរមានជ័យ ត្រូវបានសាងសង់ឡើងអំឡុងឆ្នាំ ១៩៥០។
យោងតាមលិខិតចុះថ្ងៃទី ១៧ ខែកញ្ញា ឆ្នាំ ២០១៥ របស់ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា មានប្រជាពលរដ្ឋចំនួន ៦១ គ្រួសារ បានយល់ព្រមទទួលយកសំណង ដោយឡែកមាន ៤ គ្រួសារទៀតមិនទាន់ឯកភាពទទួលយកដំណោះស្រាយនៅឡើយ។
បើតាមការអះអាងរបស់អាជ្ញាធរបាននិយាយថា អាគារនេះមានការទ្រុឌទ្រោមខ្លាំង និងសំណង់បាក់បែកដែលអាចបង្កឲ្យមានគ្រោះថ្នាក់ ដូច្នេះការរុះរើរំលំអគារនេះ នឹងអនុញ្ញាតឲ្យប្រជាពលរដ្ឋចាកចេញពីអាគារចាស់នេះដោយសុវត្ថិភាព។
អគារអង្គរមានជ័យ ត្រូវបានគេចាត់ទុកជាអគារបុរាណមួយក្នុងរាជធានីភ្នំពេញ ដូចជាអគារចំណាស់ផ្សេងៗមួយចំនួនទៀត ដែលកំពុងប្រឈមនឹងការវាយរំលំ។
កាលពីខែកក្កដា ឆ្នាំ ២០១៧ អាគារប៊ូឌីញ ស ដែលជាអគារចំណាស់សាងសង់ឡើងក្នុងឆ្នាំ ១៩៦៤ មានប្រជាពលរដ្ឋចំនួន ៤៨៣ គ្រួសាររស់នៅ ត្រូវបានវាយកម្ទេចបន្ទាប់ពីបានផ្តល់សំណងទៅគ្រួសារដែលរស់នៅទីនោះ៕
Comments