(រូបភាព៖ BBC News)

រដ្ឋ ការណាតាកា (Karnataka) ភាគត្បូងនៃប្រទេសឥណ្ឌា គឺជារដ្ឋសម្បូរទៅដោយក្រុមហ៊ុនព័ត៌មាន​វិទ្យា (IT) ធំៗលើពិភពលោក ។ រដ្ឋនេះបានក្លាយជារដ្ឋដំបូងគេបង្អស់នៅឥណ្ឌា ដែលផ្តល់ថ្ងៃឈប់សម្រាក​ដល់ស្រ្តី​ ដែលធ្វើការងារផ្លូវការនៅពេលពួកគេមានវដ្តរដូវ។ នេះបើយោងតាមការចេញផ្សាយរបស់ BBC News។

បើតាមសារព័ត៌មាន BBC បន្តថា គោលនយោបាយថ្មីមួយនេះនឹងផ្តល់ឲ្យស្ត្រី ដែលមានអាយុចន្លោះចាប់ពី ១៨ រហូតដល់ ៥២ ឆ្នាំ ធ្វើការនៅវិស័យ​រដ្ឋាភិបាល និងឯកជន អាចឈប់សម្រាកពេលមករដូវមួយថ្ងៃរៀងរាល់ខែ។ ការឈប់សម្រាកនេះ មិនចាំបាច់មានវិញ្ញាបនបត្របញ្ជាក់សុខភាពនោះឡើយ ។

បើតាមការចេញផ្សាយរបស់ BBC ថា គោលនយោបាយនេះគ្របដណ្តប់លើស្ត្រីពី ៣៥០,០០០ ទៅ ៤០០,០០០ នាក់នៅក្នុងវិស័យផ្លូវការ។ ទោះយ៉ាងណា វានៅតែមិនអាចគាំទ្រក្រុមស្ត្រីក្នុងវិស័យការងារក្រៅប្រព័ន្ធដែលមានចំនួនប្រមាណ ៦លាននាក់ ដែលកំពុងធ្វើការជាកម្មករតាមផ្ទះ កម្មករប្រាក់ឈ្នួលប្រចាំថ្ងៃ និងកម្មករតាមកិច្ចសន្យារយៈខ្លី​។ អ្នកជំនាញលើកឡើងថា គោលនយោបាយគួរតែពង្រីកដល់វិស័យក្រៅប្រព័ន្ធ។

បើក្រឡែកមើលក្នុងគោលនយោបាយឈប់សម្រាកពេលមករដូវនេះ បានចាត់ទុកថាមានសារៈសំខាន់សម្រាប់ការដាក់បញ្ចូលវិស័យឯកជនជាលើកដំបូងដោយអនុវត្តលើ​និយោជិត ដោយមិនគិតពីប្រភេទការងារ ឬកិច្ចសន្យា។

សារព័ត៌មាន BBC ផ្សាយ​បន្ថែម​​ថា បើ​តាមគោលនយោបាយ នៃការឈប់សម្រាក​អំឡុងពេលស្ត្រី​មករដូវមិនមែនជារឿងថ្មីនោះទេ។ មានប្រទេសមួយ​ចំនួន​ក៏បាន​អនុវត្តគោលនយោបាយនេះ​ផង​ដែរ ដូចជាប្រទេស អេស្ប៉ាញ ជប៉ុន កូរ៉េខាងត្បូង និងឥណ្ឌូនេស៊ី។

រីឯរដ្ឋមួយចំនួនរបស់ប្រទេសឥណ្ឌាក៏ផ្តល់ការឈប់សម្រាកពេលមានរដូវ កំណត់តែក្នុងវិស័យការងាររដ្ឋាភិបាលនៅក្នុងរដ្ឋបិហារ (Bihar) និង រដ្ឋអូឌីសា (Odisha) ផ្តល់រយៈពេលពីរថ្ងៃក្នុងមួយខែ ចំពោះតែបុគ្គលិកក្នុងវិស័​យរដ្ឋ ខណៈដែលរដ្ឋ Kerala បានផ្តល់ឈប់សម្រាក​សម្រាប់​បុគ្គលិកស្ត្រី​ក្នុងវិទ្យាស្ថានបណ្តុះបណ្តាល និងឧស្សាហកម្ម៕