រូបភាព៖ ការតាំងលក់បារីនៅសាធារណៈ
អ្នកជំនាញផ្នែកសុខភាពអះអាងថា ការជក់បារីបង្កើតហានិភ័យខ្ពស់ក្នុងការកើតជំងឺធ្ងន់ធ្ងរដូចជាបេះដូង ជំងឺសួត និងមហារីក។
លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជា (CMH) បានរៀបរាប់ថា បារីមានសារធាតុគីមីគ្រោះថ្នាក់ជាច្រើន ក្នុងនោះមានសារធាតុគីមី នីកូទីន ដែលបណ្តាលឱ្យញៀនខ្លាំង បង្កឱ្យស្ទះសរសៃឈាមតូចៗ និងប៉ះពាល់ដល់ស្បែកឆាប់ចាស់។ លោកបន្តថា សារធាតុគីមីនេះ ក៏អាចបង្កជំងឺធ្ងន់ៗ ដូចជា ជំងឺបេះដូង ជំងឺដាច់សរសៃឈាមខួរក្បាល ជំងឺខ្យល់គរ មហារីក ជំងឺទឹកនោមផ្អែម និងបញ្ហាសរសៃប្រសាទជាដើម។
លោកលើកឡើងអំពីផលប៉ះពាល់បន្ថែមថា៖ «បើនិយាយអំពីខាងក្នុងរាង្គកាយវិញ នៅពេលដែលវាបង្រួមសរសៃឈាមតូចៗ ធ្វើឲ្យស្ទះសរសៃឈាមដែលបណ្តាលឲ្យ stroke មានជំងឺខ្យល់គរ អាចជំងឺក្បៀតសរសៃឈាមបេះដូង -ល-។ ដែលជាជំងឺយ៉ាងធ្ងន់ធ្ងរ ហើយ នៅមានជំងឺផ្សេងៗទៀតដែលស្ទើរគ្រប់សរីរាង្គ ដូចជាមហារីក ដូចជាប៉ះពាល់ទៅដល់លំពែងដែលបង្កជាជំងឺទឹកនោមផ្អែម ប៉ះពាល់ទៅដល់ជំងឺក្រពះ ទៅដល់សរសៃប្រសាទ -ល-»។
លោកវេជ្ជបណ្ឌិត គង់ មុំ បន្ថែមថា សារធាតុគីមីទីពីរក្នុងបារីគឺហៅថាជ័រ។ ជ័រនេះអាចជាប់នៅលើក្រចកដៃ ធ្មេញ និងបបូរមាត់ ហើយបង្កហានិភ័យមហារីក ដែលហានិភ័យខ្លាំងបំផុតគឺនៅប្រព័ន្ធដំណើរការរបស់រាង្គកាយ ចាប់ពីទងសួត ដល់សួត។ អ្នកជំនាញប្រាប់ថា ប្រហែល៩០% នៃករណីមហារីកសួត មានទំនាក់ទំនងដោយផ្ទាល់ទៅនឹងការជក់បារី។ លើសពីនេះក៏មានសារធាតុគីមីផ្សេងៗទៀតក្នុងបារី ដែលអាចបង្កផលប៉ះពាល់ដល់សុខភាពផងដែរ។
លោកបន្តថា អ្នកមិនជក់បារីដែលស្ថិតនៅជិតអ្នកជក់អាចរងផលប៉ះពាល់ដូចអ្នកជក់ផ្ទាល់ ហើយកាន់តែស្ថិតនៅជិតយូរ ហានិភ័យកាន់តែខ្ពស់។ រីឯការស្រូបផ្សែងបារីប៉ះពាល់ខ្លាំងដល់កុមារ និងស្ត្រីមានផ្ទៃពោះ ដែលអាចបណ្តាលឲ្យរលូតកូន ឬកូនកើតមិនគ្រប់ខែ។
យោងតាម អង្គការសុខភាពភិពលលោក (WHO) ចុះផ្សាយខែមីនា ២០២៥លើកឡើងថា ផលិតផលបារីដែលត្រូវបានជក់ មានសារធាតុគីមីជាង ៧,០០០ ប្រភេទ ដោយក្នុងនោះយ៉ាងហោចណាស់ ២៥០ ប្រភេទ គឺជាសារធាតុគីមីដែលគេដឹងថាគ្រោះថ្នាក់ ឬអាចបង្កជាជំងឺមហារីក។ សារធាតុដូចជា ជ័រ កាបូនម៉ូណុកស៊ីត និងនីកូទីន គឺជាសារធាតុពុល ញៀន និងអាចបង្កគ្រោះថ្នាក់ដល់សរសៃឈាម និងបេះដូង៕
Comments