រូបភាពក្រសួងសុខាភិបាល នាថ្ងៃទី៣ ខែកុម្ភៈ ឆ្មាំ ២០២២. (រូប​ភាពពី÷ហ្វេសប៊ុក​ក្រសួង​សុខាភិបាល)

ក្រសួងសុខាភិបាលកម្ពុជា ច្រានចោលការចោទប្រកាន់ថា ​បុរស​ជនជាតិ​ថៃម្នាក់​ អាយុ២៤ឆ្នាំ បាន​ស្លាប់​បាត់បង់ជីវិត​ដោយសារ​មន្ទីរពេទ្យក្នុងស្រុកមួយនៅទីក្រុង​ប៉ោយប៉ែត ខេត្តបន្ទាយមានជ័យ​​ បដិសេធ​មិន​ព្យាបាល​បុរស​ជនជាតិ​ថៃ។

សេចក្តីប្រកាសព័ត៌មាន​ចេញនៅថ្ងៃទី ០៨ ខែតុលា ឆ្នាំ ២០២៥បញ្ជាក់ថា បើតាម​ការ​ស្រាវជ្រាវជាក់ស្តែង និង​ការពិនិត្យ​របស់​អាជ្ញាធរ​មូលដ្ឋាន​បាន​បង្ហាញ​ថា បុរសជនជាតិថៃបានស្លាប់ដោយសារគាំងបេះដូង និង​មិនមានការព្យាបាល ឬ​ការបដិសេធ​ពី​មន្ទីរពេទ្យ​មុនពេលទទួលមរណភាព។

ក្រសួងសុខាភិបាល​កម្ពុជា​​បន្ថែម​តាមន័យ​ដើម​ថា ៖«សូមបដិសេធ និងច្រានចោលទាំងស្រុង​ចំពោះការ ផ្សព្វផ្សាយព័ត៌មានមិនពិត អំពីករណីពាក់ព័ន្ធនឹងមរណភាពបុរសជនជាតិថៃ ដែលមាន​អាយុ ២៤ឆ្នាំ មកពីខេត្ត Nakhon Si Thammarat នៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្ត​បន្ទាយមានជ័យ»។

ការ​ចេញ​សេចក្តី​ប្រកាស​ព័ត៌មាន​របស់​ក្រសួង​សុខាភិបាល​កម្ពុជា ធ្វើ​ឡើង​​បន្ទាប់​ពី​​សារព័ត៌មាន The Nation Thailand បានផ្សាយ​ថា ចុងភៅ Methachan ជនជាតិថៃ ត្រូវ បានប្រទះឃើញ​ដេក​នៅ​ក្រៅ​អគារ​ពាណិជ្ជកម្មមួយ​ដោយសារឈឺពោះ ហើយត្រូវបានបដិសេធមិនព្យាបាល ដោយសារតែឯកសារ និងលុយមិនគ្រប់គ្រាន់។ សារព័ត៌មាន​ថៃដដែល​បន្តថា បុរសជនជាតិថៃនោះ​​ត្រូវបានគេបញ្ជាក់ថា បានស្លាប់ដោយសារស្ថានភាពជំងឺដែលមានពីមុនមក និងជំងឺផ្លូវដង្ហើម ដែលកាន់តែធ្ងន់ធ្ងរ​ឡើង​ដោយសារ​ការព្យាបាលមិនទាន់ពេលវេលា។

ចំណែក​មន្ទីរសុខាភិបាលនៃរដ្ឋបាលខេត្តបន្ទាយមានជ័យក៏បានចេញសេចក្តីប្រកាសព័ត៌មាន​មួយដែរ​ដោយ​បាន​​​ច្រានចោលព័ត៌មាន​នោះ​ថា​​មិនពិត និង​​និង​បាន​លើកឡើងថា​ សពមនុស្សម្នាក់ត្រូវបាន​ប្រជាពលរដ្ឋ​រកឃើញនៅមុខអគារកម្ពស់ ៥ជាន់ ដែលទុកចោល មិនមែននៅ ក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែតនោះទេ។ ហើយក្រុមកោលសល្យវិច័យបានកំណត់មូលហេតុសង្ស័យថា ការស្លាប់មានមូលហេតុ​ដោយសារជំងឺគាំងបេះដូង”។

មន្ទីសុខាភិបាលបន្ថែម​ថា៖ «ដោយឡែក នៅមន្ទីរពេទ្យប៉ោយប៉ែត ក្រុមគ្រូពេទ្យមិនបានទទួល និង​ឃើញ​អ្នកជំងឺឈ្មោះ METHACHAN YOSENG មកទទួលការពិនិត្យព្យាបាលនៅក្នុងមន្ទីរពេទ្យឡើយ»។​

បើតាម​មន្ទីរ​សុខាភិបាលខេត្ត​បន្ទាយមានជ័យ ចាប់​តាំង​ពី​ខែ​មិថុនារហូតដល់បច្ចុប្បន្ន នៅ​ពេល​ច្រក​ទ្វារ​អន្តរជាតិ​ប៉ោយប៉ែត ត្រូវ​បាន​បិទ ខេត្ត​បន្ទាយមានជ័យ​បាន​​ទទួលការព្យាបាល​ជន​ជាតិ​ថៃចំនួន​៣១​នាក់ ក្នុងនោះស្រ្តី២១នាក់៕